Ich Hainreich Pawlser pfarrer ze Kyrchdorf vergich vnd tuen chund mit meinem brief, daz ich hewt, daz ist am dem tag vnd der brief geben ist, mein selgeschaft getan han in der beschaiden, daz ich daz selb geschaft ab mag genemen mynner oder mer, wie mich verlust. Ze dem ersten so schaff ich meiner pesten puecher sibnew zu meiner pfarrchirchen; das erste puech ist Liber Sumarum, daz ander ist Postilla Gorre vber Libros Sapientiales, daz dritt ist Nycolaus de Lyra vber Psalterium vnd vber Minores Prophetas vnd vber Jeremiam, daz vierd sind Quinque libri Decretales, daz fumfft daz sind Sermones Socci de tempore a festo pasche et in eodem volumine de Sanctis usque ad aduentum Domini, daz sechst ist Postilla Gorran super Ysaiam, daz sibent daz ist ain Mettenpuech, das schaff ich dem schulmaister zu des Prawnsperger mess. Von den vorgenantn puechern schollen die pfarrlewt geben zu der pfarr gen Reichenuels gelegen in Kernden sechs pfunt pfenning, die ich dahin gelten schol von meins vater wegen, vnd die vorgenannten puecher schol innhaben ain licht maister von der pfarr wegen vnd dieselben puecher schol man ausleichen den pfarrpriestern mit ainer gewissen; aber daz puech, daz zu der mess dez Prawnssperger geschaft ist warden, daz schol ain caplan inn haben. Dye andern puecher schaff ich meinn czwain schuelern Heinrico vnd Stephano Margretn der Pachmulnerin salign sun. Darnach schaff ich meinem vorgenanten schuler Heinrico mein prauns gewant, darynn er schol singen sein erste mess. Auch schaff ich meiner frawn der abptessinn zu irem gotshaws die new bibel. Ez ist auch ze merchen von der monstranczen wegen, daran man mir noch beleibt achtczehen pfunt pfening, die schaff ich auch meinem schüler Hainrico, daz er damit dezt leichter zu der priesterschaft tracht, vnd die monstranczen schol innhaben der Prawnsperger alz lang, daz man daz gelt beczahlt. Auch schaff ich czwai seydenne tuech zu czwain messgewantn zu der pfarr durch meiner sel hail willen. Nota, mir schol auch Mengstel purger ze Kirchdorf gelten czwainczk guldein; die czehen schaff ich meiner schafferin Katreyn vnd die andern czehen guldein schaff ich meiner dyern Elspetn, die mir lang trewlich gedient hat. Auch schol mir der pfarrer von Wartperg vnd sein prueder her Nicla gelten sechsczehen guldein; die schaff ich meinem sun Erasm. Item Mertel Selinger schol mir gelten vier guldein, die schaff ich auch dem Erasm. Item mir schol gelten Jokel Chursner sechszehn guldein, die vier schol er dem Erasm geben vnd die czwelif guldein schol er selb behalten. Item herr Lienhart mein gesell schol mir czwen guldein gelten, die lazz ich ym darumb, daz er Got vmb mich pitt. Auch schol mir her Lienhart ain pfunt pfening (gelten), da schol er mir mess vmb sprechen. Item waz mir der Prawnsperger gelten schol von der mess wegen, daz schaff ich dem schulmaister. Item Jekel Ernhauser schol mir gelten czehen pfunt pfening, die schol man armen läuten geben mit chuntschaft dez Pudminger vnd hern Hansen von Newnhaws. Item Vll Hueter an dem Cidweig schol mir gelten czwai pfundt vnd sechs schilling pfening; die sechs schilling lazz ich ym, daz ain pfunt schol er geben meinen nachkomen, daz ander armen läuten. Item der Pudminger schol mir gelten an ainem czehent dazz Protstrum, waz er mir davon geben wil, daz schol er halbs geben meinen nachkomen, daz ander armen läwten. Item der Scheczel schol mir gelten vierczehen schilling, die lazz ich ym. Item dez Pfeiffer witib ze Hausmaning schol mir gelten ain halb pfunt pfening, daz schol sy armen läuten geben. Item her Hanns von dem Newnhaws schol mir gelten sechs schilling vnd XXX denarios, darumb schol er machen ainen tisch her Hansen ||
||
dem Greten. Item Michel der Schreiber schol mir gelten III solidos denariorum, die lazz ich ym. Item Hainrich der Slosser schol gelten ain halb pfunt vnd X denarios, darumb schol er mir beslahen den tisch hern Hansen dem Greten. Item ich han ain puech gechauft von dem pfarrer von Petenpach vmb vier pfunt pfenning, daz schol man hin wider geben vmb daz gelt. Item der Vinsterschaider schol mir gelten ain halb pfunt pfenning, daz schaff ich armen läuten. Item noch daz haws, daz da gelegen ist an des richter stal vnd an dez Chrels hofstat, daz schaff ich zu des Prawnsperger mess nach Katrein tod meiner schafferinn. Auch ist getaidingt warten mit gewissen, daz her Michel der Schulmaister pei der mess beleiben schol sein lebteg nach pet des Prawnsperger vnd andrer piderläwt vnd nach meinem tod gesiczen mag, wo er will. Ich gib Meinharten dem Prawnsperger vnd Friedreichen den Pudminger meinen ganczen gewalt, daz daz vorgenant geschäft volpracht wert. Des vorgenanten geschaft sind czeugen her Hans vom Newnhaws, her Lienhart Hebermair von Wels, her Michel Schulmaister die czeit ze Kyrchdorf, her Hans die czeit gesell daselbs; die vorgenantn sind dapei gebesen all, daz er daz geschafft auf seinen mund wohlbedachtleich getan hat vnd hat lassen schreiben. Auch schaff ich meinen silbrein chopf, den mir maister Fricz goldsmid ze Wels gemacht hat, zu ainem chelch dem heiligen herren sand Gregori ze eren. Auch schaff ich meinen silbrein pecher meinem nachkomen, daz er Gott für mich pitt. Ze vrchund dez vorgenanten geschaffts gib ich den gegenwertigen brief mit meinem anhangunden insigel versigelten vnd darczu mit der erbern chnecht Meinharts dez Prawnsperger pfleger ze Pernstam vnd Friedreichs des Pudminger insigeln versigelt, die irew insigel durch mein fleizzing pet willen zu pezzer czeugnuss des vor verschriben geschaffts in vnd irn erben an schaden an dem brief gelegt haben. Der brief ist geben, da man czeit hat nach Christi gepurt dreyczehen hundert jar, darnach in dem achtvndnewnczkisten jar an sand Jeronimitag.

Source Fulltext: OÖUB 11 (Wien 1983), S. 744-746