Wir Wilhelm von Gots gnaden herczog ze Österreich ze Steyr ze Kernden und ze Krain graf ze Tirol etc. bekennen, daz wir vnserm getrewn Hannsen dem Kamerhuber vnserm burger ze Steyr vnd seinen erben hingelassen haben vnd lassen auch wissentlich mit dem brief vnser gericht daselbs ze Steyr mit den rechten nuczen vnd gewonhaiten, als man das von alter daselbs hat ynne gehabt von den nechst vergangen Weichnachten vber ain gancz jar vmb anderthalb hundert phunt Wienner phenning, der sy vns oder vnser erben richten vnd wern sullen zu den vier quatembern, als sitlich vnd gewöndlich ist. Wer aber, daz sy icht richtig scheden daran nemen von vrleug von pisezz oder von welherlay gepresten das geschech, der sy vns mit guter kuntschafft mochten beweisen, die sullen wir gen in gnediklich erkennen. Mit vrkund dicz briefs geben ze Wienn an Freytag nach Erhardi episcopi nach Kristi gepurd dreuczehenhundert jar vnd in dem achtvndnewnczigistem iare.

Source Fulltext: OÖUB 11 (Wien 1983), S. 670-671