Wir Albrecht von Gotes gnaden herczog ze Österreich ze Steir ze Kernden vnd ze Krain graue ze Tyrol etc. embieten vnserm lieben getrewn Hannsen von Stubenberg vnserm phleger ze Werfenstain vnser gnad vnd alles guet. Vns ist fur komen, wie man vnsern leuten von Grein invell vnd beswerung tue vnd man fluder vber iren willen auf dem wasser an ettleichen stellen, do man vor nicht gefludert hat, das vns vnpillich dunkchet vnd nicht gevellt. Dauon emphelhen wir dir ernstleich vnd wellen, wo man also fluder oder ander newung mache, die wider dieselben vnser lewt ze Grein sein, daz du das fur sich werest vnd vnderstest vnd die egenanten vnser leut ze Grein vestikleich bey iren alten gewonhaiten vnd rechten haltest von vnsern wegen, das ist genczleich vnser maynung. Geben ze Wienn an Mittichen nach sand Petronellen tag anno ec. nonagesimo nono.||
Dominus dux per dominum Fridericum de Gors.

Source Fulltext: OÖUB 11 (Wien 1983), S. 833-834