Ich Hainreich an dem Perg, purger ze Lincz, mein hawsfraw vnd all vnser erben vergehen offenleich mit dem brif allen den, di in sehent oder horent lesen, daz wir schuldig warden sein vnd gelten sullen vnserm gnedigen herren tumbrobst Eberharten von Salczburg vnd seinem capitel oder wer vns mit dem brif von iren wegen ermanet, drew halluert salcz, di pringent an gelt sibenvndvierczig pfunt Wienner phenning vnd sechzig Wienner (pfenning) also in der beschaiden, daz wir in daran in dem nachsten herbst ir wein herauf von Chrems vnd von Arnstorf gen Lincz sullen vertigen vnd füren, wann vns ir hofmaister von Arnstorf darczu vordert an alles vercziehen vnd als oft wir in ainen dreiling herauf gen Lincz pringen, als oft sullen vns an dem obgenanten gelt herab geen newn schilling Wienner pfenning. Täten wir des nicht vnd richten si nicht aus alls obengeschriben stet, was schaden si des nämen, wie der schad genant wär, den sullen wir in genczleich widercheren vnd ablegen an alle widerred vnd pebarnusse vnd sullen si haubtgut vnd scheden haben auf vns auf vnsern trewn, darczu auf aller vnserr hab, wo wir di haben oder noch gewinnen besucht vnd vnbesucht ynner lants oder ausser lants, di ist darumb ir pfant, vor allen andern läwten vnd geltern vnd sol vnd mag sew ain ygleich herr oder richter, in des herrschaft oder gericht si oder alle vnser hab anchoment, dauon habtguts vnd scheden richten vnd wern genczleich vnd gar nach irem willen an alle vnser widerred vnd irrung. Das ist vnser pet vnd wille vnd wir sullen auch dawider chainer freyung noch gelaits geniessen in chainer weisse. Vnd des ze vrchunt geben wir in den offen brif versigelt mit des erbern weisen Vlreichen des Gaknecht diczeit tumhofmaister ze Salzburg aigen anhangunden insigel, der daz daran gehangen hat durch vnser fleissigen pet willen, im vnd seinen erben an schaden, darunder wir vns verpinden pey vnsern trewn alles daz stät ze halten vnd ze uolfüren, daz obengeschriben stet. Der brif ist geben ze Salzburg an Mitichen nach Gotsleichnambstag nach Christi gepurt drewzehen hundert iar darnach in dem newnvndnewnczigisten jare.

Source Fulltext: OÖUB 11 (Wien 1983), S. 832-833