Ich fridereich der Harlvnch vergich vnd tvn chvnt allen den, die disen prief sehent oder horent lesen, die nv sint oder her nach chvnfftig werdent, Daz ich mit verdachtem mvte vud nach meiner frevnt rat mein hvbe, die do leit avf dem Ludweigzperg vnd di mein rechtz aigen ist gewesen, han recht vnd redeleich ze chavffen gegebem Probst Gerungen vnd seinem Conventt datz walthavsen vmb zwainn firtzk phunt phening wienner mv^encz, der ich recht vnd redeleich vnd ze rechter zeit gewert pin, vnd dvrch pezzer Sicherheit vergich jch der vorgenant fridereich der Harlvnch, daz ich dem egenanten Probst Gervngen vnd seinem Convente datz walthavsen dieselben hovbe mit sampt allen meinen erben han avfgegeben vnd nach Lantzrecht verzigen vnd sol avch desselben gvtes ir gewer sein fvr ansprach aller meiner Erben, die ich nv han oder noch gewinn, als recht ist in dem Lant ze Osterreich, vnd desselben sint hintz in mein pvrgel waren Vlreich der Harlvnch mein prvder vnd Ott der Harlvnch mein Veter vnd swaz in daran abget, daz shvllen die vorgenanten herren von walthausen haben auf allem vnserm gvte, daz wir haben in dem Lant ze Ostereich, swo iz do leit oder swie iz gehaizzen ist. vnd daz in daz staet vnd vnzeprochen beleibe, dar vmb gib ich in disen prief ze ein waren zevge diser sache vnd ze einem offen vrchvnde diser rede versigelt mit meinem Insigel vnd mit meinez herren hern jansen jnsigel von Chappell vnd mit hern Marcharcz jnsigel von Osterberch. Diser wandelvng vnd der sache sint zevge her alber von volchenstorf vnd her Hadmar seiner (sic) prvder, her freitel von winthagen, her Chunrat von flachenek, vlreich der Hovser, Heinreich der Fleissez, Heinreich der Intzinger, Heinreich der Wetzel, Herweich der Holtzer, Heinreich der Richter von Nevnchirhen, Dytmar der Geyselprecht. Diser prief ist gegeben do von Christez gepu^ertt waren ergangen drevtzehen hvndert jar, in dem viertzehen (sic) jar darnach an dem nechsten tag ze Oster.

Source Fulltext: OÖUB 5 (Wien 1868) S. 127-128, Nr. 127