Ich Jans von Chappell vergich an disem prief, daz ich di aygenschaft an dem Sedmich holtze, daz Meinhart von Dvnpach ze lehen von mir gehabt hat, geben han Probst gervngen vnd seinem Conuent vnd seinem Gotzhavs hintz walthavsen ze einer stewer vnd ze einer Fvderung des vorgenanten Gotzhavs. Iz hat avch der vor genant Probst Gervnch von walthavsen daz selbe Sedmich holtz von demselben Meinharten recht vnd redeleich gechawfft seinem gotzhovs hintz walthavsen vmb zehen phvnt phening wiener mv^encz, der Er in ze rechter zeit gewert hat vnd durch pezzer sicherhait hat der egenant Meinhart fvr alle ansprach seiner erben vmb daz egenant gvte Probst Gervngen von walthavsen vnd seinem Gotzhavs gesetzet allez daz gvte, daz er von im ze lehen hat, swo daz leit vnd swi ez gehaizzen ist, vnd dar vber gib ich in ze einer vrchvnde vnd ze einem waren zevge diser sache meinen offen prief versigilten mit meinem Insigel.

Source Fulltext: OÖUB 5 (Wien 1868) S. 157-158, Nr. 159