Wir Albrecht von gots gnaden Hertzog ze Oesterreich, ze Steyr vnd ze Kernden Tun chunt mit disem brif, daz wir mit der erbern vnd geistlichen leut, des Propst vnd des Conuent gemainlich ze Walthusen willen vnd gunst eine ewige fruemesse durch Got vnd in sand Thomas eren gestiftt haben in irr chirchen datz sand Thoman, di si mit einem erbern priester irs ordens bestiften vnd begen sullen, der alle tag mess lese des morgens frue an ander gotsdienst, den man teglichen ouch do haltet vnd beget, vnd sol ouch derselb priester stetichleich bei derselben chirchen sitzen. Vnd habent vns ouch diselbn geistleichen leut von Walthusen zu derselben mess geben zwen mutt rokken vnd zwen mutt habern in der pfarr zu Mitterchirchen auf dem hof ze Innerueld vnd auf einem lehen vnd auf hofstetten daselbes dreytzehen schilling wienner pfenning geltes vnd den zehend in derselben pharr, der geho^ert gen Walthusen vnd giltet viertzehen mutt bayderlay getraydes, darumb wir in für dieselbe getrayd gult und phenning gult geben haben zway hundert phunt wienner phenning, der sie gentzlich verricht sind vnd gewert. Geschech ouch, daz si die vorgenent fruemess nicht bestiften mit einem erbern priester irs ordens vnd nicht begiengen alle morgen frue, als vor geschriben ist, so su^ellen wir sie manen, daz si ez tun, wer aber, daz si die soumung nach vnser mainung in ainen maneyd nicht widerbrechten vnd eruollten mit gotes dienst, so sullen wir oder vnser erben oder vnser nachkomen, Hertzogen zu Oesterreich dieselben messe leihen einem weltlichen priester mit der vorgenent gult, di wir von in gechouft haben, der die egenent messe mit Gotes dienst verricht vnd begee in aller der weis, als vorgeschriben stet. Des geben wir ze vrchund disen brief besigelten mit vnserm insigel. Der geben ist ze Wienn an vnsers heren Aufart tag. Nach Christs gebürde dreutzehen hundert iar, darnach in dem siben vnd viertzkisten iar.

Source Fulltext: OÖUB 7 (Wien 1876) S. 19f., Nr. 20