Wjr Wisenth Brobst von gotz gnaden, jch Johans der Techent vnd di Sammung gemainchlich ze Walthausen veriehen offenbar mit dem brief, daz vnser gnediger herr der hochgeporn furst Hertzog Albrecht von O^esterreich mit unserm guten willen vnd gunst ein ewigen fru^emesse durch got vnd in sand Thomans ern gestift hat in vnser chirchen dacz sand Thoman, die wir mit einem erbern ewigen vnsers ordens priester bestiften vnd begen sullen, der alle tag messe lese dez morgens frue an andern gotz dienst, den man auch da teglich behaltet vnd beget. Vnd soll auch der selb priester stetichlich pei der selben chirchen sitzen. Vnd haben wir dem selben vnserm herren Hertzog Albrechten zu der selben messe geben zwen mutt rokken vnd zwen mutt habern in der pharre zu Mitterkirchen auf dem hof ze Hunerueld vnd auf einem lehen vnd auf hofsteten da selbes dreitzehen schilling wienner phenning geldes vnd den zehend in der selben pharr, der gehört gen Walthausen vnd giltviertzehen mutt baiderlay getraides, dar vmb vns der vor genant vnser her Hertzog Albrecht für di selben getraid gult vnd phenning gult geben hat zwai hundert phunt wienner phenning, der wir genczlich bericht vnd gewert sein. Wer auch, da vor got sei, daz wir di vor genanten fru^emesse nicht bestiften mit einem erbern ewigen vnsers ordens priester vnd nicht begingen alle morgen frue, als vor geschriben ist, so sullen vns der vor genant vnser her Hertzog Albrecht vnd sein erben oder sein nachkomen manen, daz wir ez tu^en. Wer aber, daz wir di saumung nach irer manung in ainem maneid nicht wider brechten noch eruolten mit gotz dienst, so sullen der vorgenant vnser her herczog Albrecht vnd sein erben oder sein nachchomen, die Hertzogen in Osterrich sind, dieselben messe leihen einen andern werldlichen priester mit der vorgenanten gult, die er von vns gechouffet hat, der di egenanten messe mit gotes dienst verricht vnd bege in aller der weiz, als vorgeschriben stet. Dez geb wir ze vrchund dem egenanten vnserm herren herczog Albrechten von Osterrich vnd seinen erben oder seinen nachchomen den prief versigelten mit vnsers egenants Probst Wisents vnd dez Conuents ze Walthausen paiden anhangunden jnsigeln, der geben ist nach christi gepu^erd vber dreitzehen hundert iar, darnach in dem siben vnd viertzkisten iar an dem Auffart tag ze Walthausen in vnserm gotzhous.

Source Fulltext: OÖUB 7 (Wien 1876) S. 20f., Nr. 21