Ich Eberhart von Kappelln haubtman dats Enns vnd all mein eriben wir verjehen vnd tu^en ku^ent das wir angesehen haben die gnad vnsers gnedigen herrn hertzogen Rudolfs jn Osterreich jn Steir vnd jn Kernnden, die er tan hat dem erbern hern hern brobst zu Waldhawsen vnd dem conuent daselbs vnd auch allen jren nachkomen also, das sew oder jr ambtlewt jn dem markht zu Waldhawsen vmb all auflewff vnzu^echt vnd freuel die daselbs geschehen gerichten mu^egen vnd su^elln, auch all markht recht haben alls annder prela^eten haben weltlich vnd geistlich, allein den tod nicht ze richten, alls si haben vnsers gnedigen herrn Rudolff hertzogen brieff, vnd was vns das schade wa^er an dem lanndtgericht jn dem Machlannt, dasselb ist gen vns abtragen das die weill vnser satz gewesen ist. Wa^er aber das, das dem vorgenanten brobst vnd vorgeschriben gotshaws zu Waldhawsen das ynndert icht v^ebergriffen wůrd oder v^ebernomen vnd das sew desselben schaden nemen von vns vnd von vnsern nachkomennden eriben von des lanndgerichts wegen in dem Machlanndt das ain gewissen waer, denselben schaden su^ell wir dem vorgeschriben gotshaws zu Waldhawsen abtragen vnd su^elln auch denselben schaden auf mir vorgenanten Eberharten von Kapelln vnd auf allen, die nach vns eriben vnd vnser eribunng v^ebersitzen (haben), wir sein lebentig oder tod. Vnd daru^eber das dem vorgenantn hern brobst ze Waldhawsen vnd auch dem gotshaws daselbs vnd allen seinen nachkomen dise red vnd dise wanndlung also stet vnd vnzebrochen beleib von mir vorgenanten Eberhart von Kapelln vnd von allen meinen eriben, daru^eber gib ich dem vorgeschriben gotshaws zu Waldhawsen vnd allem dem conuent daselbs vnd allen jren nachkomen disen brief zu ainem waren vrkunt versiglt mit meinem insigl, vnd der sach sein zewg mit jren jnsigln mein o^ehaim Eberhart von Dachsperg vnd Albrecht von Streitwesen vnd her Wetzla von Erbing vnd Liutold von Stainrewt zu denselben zeitn lanndtrichter jn dem Machlannt vnd Peter der Zellenhofer, die wir all darumb gebeten haben. Der brieff ist geben dats Enns, do man zallt von vnsers hern Crists gebu^erd drewzehenhundert jar dar nach jn dem newnundfu^enfftzigistem jar des sambstag zu mitterfasten wann man singt Letare Jerusalem.

Source Fulltext: OÖUB 7 (Wien 1876) S. 638f., Nr. 627